Otsailaren 7an “KomunitateAGO, Euskal Eskola Publikoa elkarrekin eraikitzen” jardunaldia egingo dugu Gasteizeko Salburua gizarte etxean.
Pasa den abenduan “Eskola-kontseilua ebaluatzeko eta hobetzeko tresna” izeneko dokumentua osatu genuen EHIGE eta Heizek, gure eskola eta institutuetako parte-hartze prozesuei buruzko hausnarketa sustatzea helburu zuen ekarpen xumea.
Hainbat konturi buruz gogoeta eginarazi nahi genuen dokumentu horrekin: hezkuntza-komunitatearen parte-hartzea sustatzea eta bereziki egoera ahulean dauden kideena, espazio ez-formalen garrantzia, hala nola lan-espazio abegikorrak eta eraginkorrak sortzea.
Esperientzia horretatik abiatuta, hurrengo pausu bat proposatzen dizuegu: elkarrekin aurrez aurre hausnartzea hezkuntza-komunitatearen parte-hartzeak dituen zailtasunei eta indarguneei buruz. Behin hori eginda, ikastetxe parte-hartzaileagoak egiteko tresnak bilduko ditugu
Euskal Eskola Publikoan hezkuntza-komunitatearen parte-hartzean oinarritutako gobernantza-eredu baten aldeko apustua egiten dugu. Denon artean eraikitzen dugu nahi dugun eskola.
Hezkuntza-komunitatearen parte-hartzeak abantaila asko ditu. Familien parte-hartzeak, esaterako, eragin zuzena dauka seme-alaben hezkuntza-prozesuan. Baina hainbat erronka ditu familia-eskola erlazioak, eta konpromisoa eta elkarren arteko konfiantza ezinbestekoak dira.
Parte-hartze maila desberdinak daude ere, tutore-familia bileretatik hasi eta ikastetxeko proiektuak egiteko benetako prozesu parte-hartzaileak egitera arte. Noraino gaude prest?
Ikasleen aniztasunari erantzutea erronka den bezala, erronka da ere familien aniztasunari erantzutea. Zer egiten dugu normalean parte hartzen ez duten edo egoera ahulean dauden familien parte-hartzea bermatzeko?
Erronka guzti hauei erantzutea ezinbestekoa dugu komunitate ahaldunduak eraiki eta Euskal Eskola Publikoak bereak dituen printzipioei erantzuteko.
Lagun beza jardunaldi honek bide horretan.
